Editorial de mai 2005

Le premier jour du mois de May, Madame,

Dedans le coeur je senty vos beaux yeux,

Bruns, doux, courtois, rians, delicieux,

Qui d'un glaçon feroient naistre une flame.

De leur beau jour le souvenir m'enflame

Et par penser j'en deviens amoureux:

O de mon coeur les meurtriers bienheureux,

Vostre vertu je sens jusques en l'ame.

Yeux qui tenez la clef de mon penser,

Maistres de moy, qui peustes offenser

D'un seul regard ma raison toute esmue:

Ha! que je suis de vostre amour espoint,

Las! je devois jouyr de vostre veue

Plus longuement, ou bien ne vous voir point.

Ce jour de May qui a la teste peinte,

D'une gaillarde et gentille verdeur,

Ne doibt passer sans que ma vive ardeur

Par vostre grace un peu ne soit estainte.

De vostre part si vous estes attaincte

Autant que moy d'amoureuse langueur,

D'un feu pareil soulageon nostre coeur,

Qui aime bien ne doibt point avoir crainte.

Le Temps s'enfuit, cependant ce beau jour,

Nous doibt aprendre à demener l'Amour,

Et le pigeon qui sa femelle baize.

Baisez moi doncq et faison tout ainsi

Que les oyseaux sans nous donner soucy:

Apres la mort on ne voit rien qui plaise.

Pierre de Ronsard